ടെലിവിഷൻ റിയാലിറ്റി ഷോയിലൂടെ മിനി സ്ക്രീൻ പ്രേക്ഷകരുടെ ഹൃദയം കവർന്ന താരമാണ് വിൻസി അലോഷ്യസ്. കൊടികുത്തിമലയിലേക്ക് നടത്തിയ യാത്രയ്ക്കിടയിൽ പകർത്തിയ ചിത്രങ്ങൾ പങ്കിട്ടിരിക്കുകയാണ് വിൻസി.
ശാന്ത സുന്ദരമായ പ്രകൃതിയുടെ സൗന്ദര്യം ആസ്വദിക്കുന്ന വിൻസിയെ ആണ് ചിത്രങ്ങളിൽ കാണാനാവുക. യാത്രകൾ ഇഷ്ടപ്പെടുന്ന ആരെയും ആകർഷിക്കുന്ന ആമ്പിയൻസാണ് ചിത്രങ്ങളുടെ പ്രത്യേകത. 2019ൽ പുറത്തിറങ്ങിയ ‘വികൃതി’ എന്ന ചിത്രത്തിലൂടെയാണ് വിൻസി സിനിമാലോകത്തെത്തുന്നത്.
‘കനകം കാമിനി കലഹം’, ‘ഭീമന്റെ വഴി’, ‘ജന ഗണ മന’ എന്നീ ചിത്രങ്ങളിൽ ശ്രദ്ധേയമായ കഥാപാത്രം ചെയ്‌തു. ‘രേഖ’ എന്ന ചിത്രത്തിലൂടെ മികച്ച നടിയ്ക്കുള്ള സംസ്ഥാന പുരസ്കാരവും ലഭിച്ചു. ഷെയ്സൺ ഔസേപ്പ് സംവിധാനം ചെയ്യുന്ന ‘ഫെയ്സ് ഓഫ് ദ് ഫെയ്സ്‍ലെസ്’ എന്ന ബോളിവുഡ് ചിത്രത്തിലും അടുത്തിടെ വിൻസി അഭിനയിച്ചു. ചിത്രത്തിൽ കന്യാസ്ത്രീ വേഷത്തിലാണ് വിൻസി എത്തുന്നത്.
അരുൺ ബോസ് സംവിധാനം ചെയ്ത മാരിവില്ലിൻ ഗോപുരങ്ങൾ ആണ് ഇനി റിലീസിനൊരുങ്ങുന്ന ചിത്രം. സർജാനോ ഖാലിദ്, ശ്രുതി രാമചന്ദ്രൻ, ഇന്ദ്രജിത്ത് എന്നിവരാണ് ചിത്രത്തിലെ മറ്റു താരങ്ങൾ.
