പ്രണയത്തിൽ പെട്ട് മതം മാറുന്നവരിൽ കൂടുതലും പെൺകുട്ടികൾ ആണെന്ന് ജ്യോതിഷപണ്ഡിതനും ടിവി സിനിമ താരവുമായ ഹരി പത്തനാപുരം. കുമ്മല്ലൂർ ശ്രീ വിനായക ക്ഷേത്രത്തിലെ മുഖ്യാതിഥിയായി പങ്കെടുത്ത ശേഷം സദസ്സിനെ അഭിസംബോധന ചെയ്തു സംസാരിക്കുകയായിരുന്നു അദ്ദേഹം.
നമ്മൾ നമ്മുടെ ആചാരങ്ങൾ നല്ലതുപോലെ പഠിക്കണം. ആചാരങ്ങൾ നമ്മുടെ കുട്ടികളെ പഠിപ്പിക്കുകയും വേണം. നമ്മൾ ആചാരങ്ങൾ പഠിപ്പിക്കാതെ ഏതെങ്കിലും ഒരു ഘട്ടത്തിൽ നമുക്ക് ആചാരങ്ങൾ കൊണ്ട് ആവശ്യം വരുമ്പോൾ കുറ്റം പറഞ്ഞിട്ട് കാര്യമില്ല, ഇത് ഏറ്റവും കൂടുതൽ ചർച്ചചെയ്യപ്പെടുന്നത് പ്രണയത്തിൽ ആകും. കുട്ടികളെ പ്രണയത്തിന്റെ പേരിൽ മതം മാറ്റുന്ന പ്രവണത നമ്മുടെ ഇടയിലുണ്ട്.
അത് എല്ലാ മതത്തിലും ഉണ്ട്. ഹിന്ദുവിൽ നിന്നും ഇസ്ലാമിലേക്കും. ഇസ്ലാമിൽ നിന്നും കൃസ്ത്യാനിലേക്കും എല്ലാം ഉണ്ട്, അങ്ങനെ എല്ലാ മതങ്ങളിൽ നിന്നും അങ്ങോട്ടും ഇങ്ങോട്ടും മത പരിവർത്തനം വ്യാപകമായ രീതിയിൽ നടത്താറുണ്ട്. ഏറ്റവും കൂടുതൽ പ്രണയത്തിനു വേണ്ടി മതം മാറുന്നത് പെൺകുട്ടികൾ ആണെന്നാണ് എന്റെ അറിവ്. ആൺകുട്ടികൾ മതം മാറിവന്ന് വിവാഹം കഴിക്കുന്നത് കുറവാണു. എന്റെ അറിവിൽ അങ്ങനെ ഒന്ന് തീർത്തും ഇല്ല. ചിലപ്പോൾ ഉണ്ടാകാം എനിക്ക് അറിവില്ല. ഒരിക്കലും ഒരു ആൺകുട്ടി വന്നിട്ട് ഞാൻ നിന്റെ മതത്തിലേക്ക് മാറാം നിന്നെ കെട്ടാം എന്ന് പറയില്ല. അങ്ങനെ പറയുന്നതിൽ മുൻപിൽ പെൺകുട്ടികൾ ആണ്.
പെൺകുട്ടികൾ പ്രണയത്തിൽ അകപ്പെട്ട് പ്രണയത്തിലേക്ക് മാറുമ്പോൾ ആണ് ഇതിൽ നമ്മൾ ജാതിയും മതവും പിടിച്ചിട്ട് വർഗീയതയുടെ നിറം കൊടുക്കുന്നത്. നമ്മുടെ മതത്തിലെ ആചാരങ്ങൾ അനുഷ്ടാങ്ങൾ തെറ്റാണു എന്ന് പറഞ്ഞുകൊണ്ടാണ് ഇവർ മതം മാറ്റുന്നത് എന്നുപറഞ്ഞുകൊണ്ടാണ് സഹോദര മതവിശ്വാസികളെ മതത്തിന്റെ പേരിൽ കൂട്ടിക്കെട്ടി ആക്രമിക്കുന്നത്. അങ്ങനെ ചെയ്യുമ്പോൾ നമ്മൾ നമ്മളോട് ചോദിക്കേണ്ട ഒരു കാര്യമുണ്ട്. നമ്മൾ നമ്മുടെ കുട്ടികളെ എത്രത്തോളം നമ്മുടെ ആചാരങ്ങൾ പഠിപ്പിക്കാൻ ശ്രമിക്കാറുണ്ട് എന്ന്.
നമ്മുടെ ആചാരങ്ങൾ പറഞ്ഞുപഠിപ്പിക്കുന്ന എത്ര പ്രഭാഷണങ്ങൾ നടത്താറുണ്ട് ഇന്ന് ക്ഷേത്രങ്ങളിൽ. കുട്ടികൾ മതം മാറാൻ പോകുമ്പോൾ മാത്രം ആചാരങ്ങളെയും അനുഷ്ടാങ്ങളെയും കുറിച്ച് വാചാലരായിട്ട് കാര്യമുണ്ടോ. അത് ആ കുട്ടികൾ കേൾക്കാൻ തയ്യാറാകുമോ. നമ്മൾ നമ്മുടെ സഹോദര മതങ്ങൾക്ക് എതിരെ വിരൽ ചൂണ്ടുമ്പോൾ മറ്റുവിരലുകൾ നമുക്ക് നേരെയാണ് ചൂണ്ടുന്നത്. നിങ്ങൾ നിങ്ങളുടെ കുഞ്ഞുങ്ങളെ ഇത്തരം ആചാരങ്ങളും അനുഷ്ടാങ്ങളും പഠിപ്പിച്ചിട്ടുണ്ടോ എന്ന് ചോദിച്ചാൽ ഉണ്ട് എന്ന് പറയാൻ എത്ര പേർക്ക് ഉത്തരം നൽകാൻ കഴിയും.എത്ര വീടുകളിൽ സന്ധ്യാദീപം തെളിക്കാറുണ്ട്.
ഞാൻ മതപരിവർത്തനത്തിന് തീർത്തും എതിരാണ്. ഒരു പെൺകുട്ടിയോട് നീ മതം മാറി വന്നാൽ വിവാഹം കഴിക്കാം എന്ന് ഒരു ആൺകുട്ടി വന്നു പറഞ്ഞാൽ നീ മതത്തെ ആണോ പ്രണയത്തെ ആണോ വില കൽപ്പിക്കുന്നത് എന്ന് തിരികെ ചോദിയ്ക്കാൻ ഉള്ള ആർജ്ജവം നമ്മുടെ പെൺകുട്ടികൾ കാണിക്കണം.
നമ്മുടെ പെൺകുട്ടികൾ വ്യക്തിത്വം ഇല്ലാത്തവർ ആയി മാറരുത്. കാരണം ആൺകുട്ടികൾ ഒരിക്കലും മതം മാറി വരില്ല. നിങ്ങൾ അവരോട് ഇങ്ങോട്ട് മതം മാറി വരാമോ എന്നാൽ വിവാഹം കഴിക്കാം എന്ന് ചോദിക്കണം. ഞാൻ ഒരിക്കലും മറ്റുവിതവിശ്വാസത്തിൽ ഉള്ള ആളുകളെ കുറ്റം പറയില്ല. കാരണം അവർ കൃത്യമായി അവരുടെ വിശ്വാസങ്ങളും ആചാരങ്ങളും അവർ പഠിപ്പിക്കുന്നുണ്ട്. അതുപോലെനമ്മുടെ നല്ല ആചാരങ്ങൾ നമ്മുടെ കുട്ടികളെയും പഠിപ്പിക്കണം. അല്ലാതെ അവർ മതം മാറാൻ പോയിട്ട് പറഞ്ഞിട്ട് കാര്യമില്ല- ഹരി പറയുന്നു.