മലയാള സിനിമയ്ക്ക് മറ്റഒരു മികച്ച കലാകാരിയെ കൂടെ നഷ്ടപ്പെട്ടിരിക്കുന്നു. നാടകങ്ങളിലൂടെ അഭിനയ ലോകത്തേക്ക് എത്തിയ കനകലത നാനൂറിന് അടുത്ത് സിനിമകള്‍ ചെയ്ത നടിയാണ്. തമിഴ് – മലയാളം സിനിമകളില്‍ മാത്രമല്ല സീരിയലുകളില്‍ സജീവമായിരുന്നു കനകലത. ഒന്‍പതാം വയസ്സില്‍ നാടകങ്ങളിലൂടെ അഭിന. ലോകത്ത് എത്തിയ കനകലത ഡബ്ബിങ് മേഖലയിലും സജീവമായിരുന്നു.
പ്രിയപ്പെട്ട സഹപ്രവര്‍ത്തകയുടെ വേര്‍പാടില്‍ ദുഃഖം അറിയിച്ച് പലരും സോഷ്യല്‍ മീഡിയയില്‍ എത്തിയിരുന്നു. അസുഖമാണ് എന്നറിഞ്ഞിട്ടും, അവസാനകാലം ഒന്ന് വന്ന് നോക്കാത്തതിന് ക്ഷമ പറഞ്ഞുകൊണ്ടാണ് നടിയും ഡബ്ബിങ് ആര്‍ട്ടിസ്റ്റുമായ ഭാഗ്യലക്ഷ്മിയുടെ ഇന്‍സ്റ്റഗ്രാം പോസ്റ്റ്.
‘നമ്മള്‍ എപ്പോഴും വിചാരിക്കും ഇവരെ കണ്ടിട്ട് കുറേ വര്‍ഷമായല്ലോ. നാളെ വിളിക്കാം അല്ലെങ്കില്‍ പോയി കാണാം എന്ന്. അങ്ങനെ ആ നാളെ നീണ്ടു നീണ്ടു ഒടുവില്‍ അവര്‍ അന്തരിച്ചു എന്ന വാര്‍ത്തകേള്‍ക്കുമ്പോള്‍ ഉള്ളില്‍ കുറ്റബോധം തോന്നും. കനകലതയുടെ കാര്യത്തില്‍ ഞാന്‍ അങ്ങനെ ചിന്തിച്ചു. പലപ്പോഴും വിചാരിച്ചിരുന്നു വിളിക്കണം അന്വേഷിക്കണം എന്നൊക്കെ’
‘ഇത്രയും വയ്യാതിരുന്നിട്ടും അറിഞ്ഞില്ല അന്വേഷിച്ചില്ല, പോയി കാണാന്‍ തോന്നിയില്ലല്ലോ. ഇനി ഒരിക്കലും കാണാന്‍ പറ്റില്ല. സോറി പോലും പറയാനും പറ്റില്ല. വലിയ സൗഹൃദമൊന്നും ഇല്ലെങ്കിലും കാണുമ്പോള്‍ വളരെ സ്‌നേഹത്തോടെ സംസാരിച്ചിരുന്നു, സങ്കടങ്ങള്‍ പങ്കുവച്ചിരുന്നു. ഓരോ മരണവും ഓരോ ഓര്‍മപ്പെടുത്തലാണ്. സ്മരണാഞ്ജലികള്‍’ ഭാഗ്യലക്ഷ്മി ഇന്‍സ്റ്റഗ്രാമില്‍ കുറിച്ചു
തലച്ചോറ് ചുരുങ്ങുന്ന ഡിമന്‍ഷ്യ എന്ന രോഗാവസ്ഥയിലായിരുന്നു കനകലത. 2021 ല്‍ കൊവിഡ് കാലത്തിന് ശേഷമാണ് രോഗലക്ഷണങ്ങള്‍ കണ്ടു തുടങ്ങിയത്. പയ്യെ പയ്യെ സ്വന്തം പേര് പോലും മറന്ന് പോകുന്ന അവസ്ഥയിലേക്ക് പോയി. മൂന്ന് വയസ്സുള്ള കുട്ടികളെ പോലെയായിരുന്നു അനസാന കാലങ്ങളില്‍ കനകലതയുടെ പെരുമാറ്റം എന്നാണ് റിപ്പോര്‍ട്ടുകള്‍.